KMT Сервис: Системот IBAK помага во отстранувањето на 35 тони бетон од канализацијата под Мерцедес-Бенц Арена

Познат до неодамна како Mercedes-Benz Arena, MHPArena Stuttgart е главниот фудбалски стадион во Штутгарт, а воедно и домашен терен на фудбалскиот клуб VfB Stuttgart. Овој голем спортски комплекс се наоѓа во рамките на NeckarPark – најголемата зона во градот за спортски и културни настани, во непосредна близина на Porsche Arena, Hanns-Martin-Schleyer-Halle и музејот Mercedes-Benz. Во 2023 година, во пресрет на UEFA EURO 2024, стадионот беше подложен на обемна модернизација, која предизвика и невообичаен предизвик за канализациската инфраструктура. При изградбата на долниот сектор на главната трибина, бетон навлегол во дел од канализацискиот систем и целосно блокирал шест делници од цевководот. За негово отстранување беше избрана технологија за чистење со воден млаз под ултрависок притисок, со помош на мобилниот систем MicroGator на IBAK. Повеќе за проектот за BalkanEngineer.com открија од КМТ Сервис – етаблирана трговска и инженеринг-компанија која ги нуди производите на IBAK.

Системот MicroGator вклучува самоодна платформа, систем за управување и панорамска камера во боја. Наменет е за рехабилитација на канализациски колектори и овозможува инспекција, сечење со ултрависок притисок, вбризгување заптивни смеси и поставување ремонтни манжетни. Во конкретната примена, стандардната опрема на платформата е заменета со специјална алатка на која може да се монтираат млазницата и цревото за воден млаз под висок притисок. Алатката овозможува навалување, вртење и насочување на млазницата под различни агли.

„Во овој случај беше употребена млазница за воден млаз од компанијата Falch, која може да испорачува од 11 до 26 l/min вода и овозможува непречено регулирање на притисокот од 600 до 2500 bar. Системот располага и со резервоар за вода со капацитет од 400 l, што овозможува автономна работа без надворешно водоснабдување во одреден временски период“, појаснија од компанијата.

„За само два месеца, од канализацискиот систем под стадионот беа отстранети вкупно околу 35 t бетон, долж траса од 400 m, без изведување ископни работи. Благодарение на системското решение на IBAK, бетонскиот чеп беше успешно отстранет без оштетување на цевководната конструкција“, дополнија од КМТ Сервис.

Извор на фотографии: КМТ Сервис, IBAK