KMT Service: Pajisjet për inspektimin e kanalizimeve të IBAK “shpëtojnë” dy objekte historike të rëndësishme në Saksoni

Dy objekte historike të rëndësishme në Saksoni përfitojnë nga teknologjia e inspektimit të kanalizimeve të IBAK për të ruajtur rëndësinë e tyre arkitekturore dhe kulturore për komunitetin lokal. Kalaja Königstein dhe kështjella Hirschstein – të dyja në afërsi të Dresdenit, Gjermani – janë ndër projektet ku kompania lokale Komplex Umweltservice përdor kamera, sisteme inspektimi dhe softuer për ekzaminimin e infrastrukturës nëntokësore të markës IBAK, ndërsa detajet për BalkanEngineer.com u prezantuan nga kompania KMT Service.

Çdo vit në dhjetor, në kalanë Königstein zhvillohet një treg tradicional i Adventit, i cili konsiderohet një nga më të bukurit në Gjermani. “Përgatitjet për festën, megjithatë, përfshijnë edhe aktivitete që mbeten të padukshme për sytë e vizitorëve, por kanë rëndësi vendimtare për komoditetin e tyre. Një nga më të rëndësishmet është pastrimi parandalues i tubacioneve të kanalizimit, për të shmangur surpriza të pakëndshme në tualete gjatë fluksit të shtuar të njerëzve. Është e domosdoshme të sigurohet shkarkimi pa probleme i ujërave të ndotura përmes kanalizimit, për çka tubat inspektohen me sistemet MiniLite dhe ORION”, shpjeguan nga KMT Service.

Në një shkëmb 25 metra të lartë në bregun e majtë të lumit Elba, përballë Diesbar-Seußlitz, ngrihet kështjella Hirschstein. Fillimisht e ndërtuar si fortesë në shekullin e 10-të, ndërtesa mori pamjen e saj aktuale pas një rindërtimi të gjerë, të përfunduar në vitin 1894. Megjithatë, koha tashmë ka lënë gjurmët e saj. “Për një koncept të plotë rehabilitimi, nuk duhet vetëm të zbulohet shkaku i lagështisë së madhe në kështjellë, por edhe të mblidhen të dhëna për gjerësinë, gjatësinë dhe lartësinë e tubave. Për këtë qëllim, Komplex Umweltservice përdor sistemin me kamera MiniLite, me të cilin mund të kryhen matje 3D të traseve të tubacioneve, së bashku me modulin softuerik 3D GeoSense dhe kamerën ORION 2.8 L pan and rotate, të pajisur me sensor 3D. Përveç kësaj, për punën është i nevojshëm një sistem kompakt portativ, pasi oborri i brendshëm me kalldrëm është i aksesueshëm vetëm përmes dyerve të ambienteve përreth”, treguan nga KMT Service.

Burimi i materialit fotografik: KMT Service, IBAK