Grundfos и три престижни универзитети развиваат проект за иднината на одржливото ладење

Глобалниот лидер во енергетски ефикасни водни решенија Grundfos се приклучува на меѓународна истражувачка иницијатива која има за цел да го намали до 30% енергетското потрошување за ладење во мегаградовите, токму во време кога побарувачката за вакви системи се очекува да се зголеми трипати до 2050 година. Партнерството обединува академски институции од Сингапур и Данска со индустриското искуство на Grundfos во развој на иновативни водни технологии. Заедничката работа е финансирана со грант од над 9 милиони долари и е насочена кон реални решенија применливи во најгусто населените градови во светот. Целта е најмалку половина од развиените технологии да стигнат до пазарот и да направат мерлива разлика за луѓето и животната средина.

Климатските промени ги ставаат градовите пред сериозна дилема. Потребата за ладење расте експоненцијално, но традиционалните системи трошат огромни количини енергија и придонесуваат за јаглеродни емисии. Според ОН, побарувачката за системи за ладење ќе се зголеми трипати до средината на векот, особено во мегаградовите со над 10 милиони жители. Токму како одговор на оваа реалност се создава иницијативата Sustainable Water-based Cooling in Megacities (SWiM) – заеднички проект помеѓу Технолошкиот универзитет Нанјанг во Сингапур, Универзитетот во Алборг и Универзитетот во Архус во Данска. Фокусот на иницијативата е развој на интелигентни системи за ладење, кои главно се напојуваат со обновлива енергија.

Grundfos официјално го објави своето партнерство со трите универзитети со цел да се создадат технологии кои функционираат не само во лабораториски услови, туку и во реална урбана средина. Истражувањата се финансираат со бесповратен грант од 9.4 милиони долари од Фондацијата Grundfos и се усогласени со националните климатски цели на двете земји – Сингапур се стреми кон нето нула емисии до 2050 година, а Данска до 2045 година. Во рамките на проектот ќе се развиваат алатки за урбанo енергетско планирање, алгоритми за балансирање на потребите за ладење со стабилноста на мрежата, како и системи со вештачка интелигенција за предиктивно одржување и рано откривање на дефекти.

Извор на фотографски материјал: Grundfos, ©Engineer BG via Canva.com