Романската Агенција за железничка реформа го избра Siemens Mobility за испорака на 12 возови на водород

Германскиот технолошки гигант Siemens Mobility е избран од романската Агенција за железничка реформа (ARF) за изведувач на договорот за испорака на 12 електрични возови со водородни горивни ќелии. Вредноста на нарачката изнесува речиси 325 милиони евра (без ДДВ), а договорот вклучува и одржување на возовите во период од 30 години, дознава BalkanEngineer.com од економското издание Romania-Insider.com.

Новите возови се наменети за опслужување на неелектрифицирани линии околу главниот град Букурешт, вклучувајќи ги правците кон Питешт, Трговиште и меѓународниот аеродром „Анри Коанда“. Конзорциумот кој победи на тендерот е составен од одделите на Siemens Mobility во Романија, Германија и Австрија.

Главен предизвик останува финансирањето, бидејќи поради доцнење на процедурите, Романија го изгуби пристапот до средствата од Националниот план за закрепнување и отпорност (PNRR). Сега властите работат на обезбедување алтернативни извори преку Модернизацискиот фонд на ЕУ.

Извор на фотографиите: ©Engineer BG via Canva.com